Þankar miðaldra einyrkja

Íslenskur sköpunarkraftur og þjóðhagsspá

Hún Þóra Huld frænka mín minnir mig á að það megi vera jákvæður líka. Ég veit nú ekki hvort þessi færsla er í mínus eða plús, fer eftir því með hvernig hugarfari hún er lesin, kannski. En, sem sé, ég heyrði óvart í fréttum í dag að vöruskiptajöfnuðurinn við útlönd (heitir það annars ekki það enn þá?) hefði verið mun skárri en spáð hafði verið í þjóðhagsspá. Hvað höfðu menn svo misreiknað? Jú, þjónustu við útlönd, sem líklega byggist að mestu á íslensku hugviti og sköpun. Menn hafa sem sé gleymt að reikna með aukningu þar, líklega haldið að allir færu að rótast í góðærisbyggingavinnu fyrir sunnan og stíflugerð fyrir austan, eða kannski óskað þess að þeir færu í það. Það er auðvitað áþreifanlegri iðja en að sitja við tölvu og dútla sér ...

Þetta minnir mig á Draumalandið, þar sem Andri Snær bendir á hvað mætti gera rosalega miklar tilraunir með alla mögulega og ómögulega hluti sem frjóu ungu fólki detta í hug - og mistakast flestar - til að skapa störf sem væru jafn mörg eða fleiri en í fabrikkunni fyrir austan - og tæki margar aldir að ná þeim upphæðum sem hún kostar.

sagði Helga kl. 19:43 2 athugasemd(ir)

Svartagallsraus eða heimur versnandi fer

Ágæt vinkona mín úr mínum geira, þó nokkrum árum yngri en ég, sagði mér frá því fyrir nokkrum árum að nú væri orðið áberandi í íslenskudeildinni í Háskólanum fólk sem væri mjög vont í íslensku. Þetta væru krakkar sem langaði til að verða blaðamenn, kannski þó helst af öllu Kastljósdúllur eða -dúllarar, og færi í deildina til að "láta laga í sér íslenskuna" því það hefði heyrt að það væri sniðugt að vera skrifandi og kannski talandi í svona störfum. Nú sækti ekki lengur í þetta nám eintómt fólk sem fékk alltaf 10 í ritgerð í menntaskóla, með ofuráhuga á bókmenntum eða málfræði o.s.frv. Ég held að þetta passi alveg. Það er líka alltaf að fjölga rithöfundum sem ekki geta skrifað en stóla á fólk (eins og mig) sem lagar úr því subbuskapinn og gerir hann á endanum útgáfuhæfan, eða hér um bil.

Kannski er unga fólkið þó hætt að leita sér lækninga í íslenskudeildinni núna, það veit að það fær samt að skrifa í blöðin, eins og dæmin sanna.

sagði Helga kl. 12:13 3 athugasemd(ir)

Löng leið - lítið erindi

Það hringdi til mín kona í morgun frá Japan og bað mig að þýða 50 orð. Ég urraði á hana.

sagði Helga kl. 16:45 1 athugasemd(ir)